ውድ የማህበራችን አባል፡

የማክበር ሰላምታችንን በማስቀደም፡

የቅድስት ማርያም ራስ አገዝ መረዳጃ ማህበር የምግባረ ሠናይ ኮሚቴ ባለፉት ሦስት ዓመታት የትንሣዔን በዓል ምክንያት በማድረግ ለሀገሩ እንግዳ ለሆኑና በተለያዩ ምክንያቶች እለቱን በብቸኝነት ለሚያሳልፉ ወገኖቻችን ባደረጋቸው ቤተሰባዊ የፋሲካ ዝግጅቶች በድጋፍ ሰጪነት (sponsorship) የተሳተፋችሁትን ሁሉ ከልብ እያመሰገንን ፈቃደኝነቱ እያላችሁ ዕድሉ ላልደረሳችሁ ደግሞ ይህ ዓይነቱ የምግባረ ሠናይ ተግባር ቀጣይ እንደመሆኑ መጠን ምንጊዜም አስተዋፅዖ ማድረግ እንደምትችሉ በትህትና እንገልፃለን። በዚህም አጋጣሚ እስካሁን በተደረጉት ዝግጅቶች ታዳሚ የነበሩ ተጋባዦች የተሰማቸውን ስሜትና ከመስተንግዶው ያገኘነው ምላሽ ምን እንደሚመስል ለማወቅ መጓጓታችሁ አይቀርም።

እናም ጥሪው የፋሲካ በአል ምሳ እንደመሆኑ መስተንግዶው ለበዓሉ የሚስማሙ በዓይነት የተሠሩ የሀገራችን የባህል ምግቦችና ለማወራረጃ የሚሆኑ ለስላሳና መለስተኛ መጠጦችን በማካተት በባህላዊ ቡናና ቁርስ ስነ ሥርዓት የታጀበ ነው። ይህንንም ተከትሎ በቤተሰባዊ የዓመት በዓል ጨዋታ መሠረት የትውውቅና የልምድ ልውውጥ ውይይቶች የሚካሄዱ ሲሆን ይህም እንግዶቹ ስለ በዓሉ የተሰማቸውንና ለሀገሩ እንግዳ ሆነው ያጋጠማቸውን ለመግለጽ ያስችላቸዋል።

በመሆኑም ባለፉት የልምድ ልውውጥ ውይይቶች ቀደም ሲል የመጡና በተለያዩ ፈታኝ ሁኔታዎች ውስጥ አልፈው በሕክምና በዳኝነት በጥብቅና በምህንድስና በምርምርና በማህበራዊ አማካሪነት ሞያዎች ላይ የተሰማሩ ወገኖቻችን ከራሳቸው ልምድ በመነሳት ጠቃሚ ምክሮችን ያካፈሉ ሲሆን እንግዶቹም እንደዝንባሌያቸው ጥያቄ በማቅረብ ሁኔታው እንደፈቀደ መልስ ተሰጥቶእል። በጥቅሉም የፋሲካው ጥሪ ቀድሞውኑ ያልጠበቁትና ከወገኖቻቸው ጋር ተሰብስበው ገበታ መሳተፋቸው የበዓል ቀን ብቸኝነታቸውን ምን ያህል እንዳስረሳቸውና የልምድ ልውውጡም “እኔም እችላለሁ” የሚል ተስፋ እንዳጫረባቸው በስሜት በመግለጽ ተግባሩ መበረታታት እንዳለበት በአጽንዖት ገልፀዋል።

ታዲያ በዚህም ዓመት ይህንኑ በቤተሰባዊ መንፈስ የትሞላ የፋሲካ መስተንግዶ ሚያዝያ ፳ ቀን ፳፻፲፩ ዓ/ም (April 28, 2019) በተመሣሣይ ሁኔታ የምናዘጋጅ ስለሆነ መደገፍ የምትፈልጉትን ሰው ቁጥር (በሰው $15 ሂሳብ) በመጥቀስ በጎ ፈቃዳችሁን በስልክ ቁጥር፡

(647) 865-1641 (ለወ/ሮ መቅደላዊት አበበ) ወይም

(416) 807-9471 (ለወ/ሮ ፋሲካ ሲሣይ) ትገልጹ ዘንድ በትህትና እንጠይቃለን።

ከአክብሮት ጋር

የቅድስት ማርያም ራስ አገዝ የመረዳጃ ማህበር